Ese Gen. James Kabarebe azajya iparis gusobanura ihanurwa ry’ indege ya Habyarimana?

Umucamanza w’ umufaransa, Jean-Marc Herbaut yoherereje Minisitiri w’ ingabo z’ u Rwanda, Gen. James Kabarebe urupapuro rumuhamagaza i Paris kugirango atange ibisobanuro ku ihanurwa ry’ indege yari itwaye Perezida Habyarimana na bagenzi be ku itariki 6 Mata 1994.

Iyi nkuru dukesha RFI ivuga ko uyu Jean-Marc Herbaut yifuza kuzabaza Gen. Kabarebe ibibazo binyuranye bijyanye n’ ihanurwa ry’ indege ya Juvenal Habyarimana nk’ uko u Bufaransa buhora bubishinja izari ingabo za FPR/Inkontanyi.

Mu rupapuro rwa Jean-Marc Herbaut ruhamagaza Gen. James Kabarebe yifuza ko azitaba i Paris mu Bufaransa, ku itariki ya 14 Ukuboza 2017.

Jean-Marc Herbaut yahamagaje Minisitiri w’ ingabo ,Gen. James Kabarebe gutanga ubusobanuro mu gihe ngo hazaba hari n’umutangabuhamya witwa Frank Nziza uvuga ko ari mu basirikare babiri ba RPF/Inkotanyi ngo bahanuye indege ya Habyarimana.

Uyu mutangabuhamya, Frank Nziza watorotse igisirikare cya RPA yemeza ko ari no mu bantu bazanye imbunda yo mu bwoko bwa missile SA-16 ayivanye ku cyicaro gikuru cyari ku Mulindi hafi y’ umupaka wa Uganda nk’ uko tubikesha AFP.

Frank Nziza wahungiye mu Bwongereza avuga kandi ko izo misile yazipakiye mu ikamyo muri Werurwe 1994 azijyana i Kigali, James Kabarebe  amuhagarariye.

Ese u Bufaransa ntibwaba buyobya uburari?

Umwanditsi Jacques Morel, wanditse igitabo “ La France au Coeur du génocide”, ugenekereje mu Kinyarwanda bishatse kuvuga “U Bufaransa mu mutima wa jenoside”, akaba ari impuguke ku Rwanda, amaze imyaka 12 yegeranya inyandiko zigaragaza uruhare rw’u Bufaransa mu Rwanda, aho yemeza ko impamvu buhakana ko indege ya Habyarimana yahanuwe n’ingabo ze zitifuzaga gusaranganya ubutegetsi, ari ukubera ko nabwo bwahamwa n’icyaha kuko ari bwo bwafashaga igisirikare cy’u Rwanda.

Ni ku nshuro ya 9 Abafaransa bagerageza iperereza ku mpamvu zateye ihanurwa ry’indege ya Habyarimana mu 1994, indege yanaguyemo n’abapilote b’Abafaransa bayitwaraga. Ihanurwa ry’iyi ndege rikaba rifatwa nk’imbarutso ya jenoside yakorewe Abatutsi. Iryo perereza ryatangiye nyuma y’imyaka 4 ibyo bibaye.

Mu kiganiro yahaye ikinyamakuru Sputnik France, uyu mwanditsi Jacques Morel yabajijwe icyaba kihishe inyuma y’iri perereza rikomeje gukorwa ku ihanurwa ry’indege ya Habyarimana, asubiza ko ryatangiye mu 1998 bigizwemo uruhare n’abadepite, ari naho agaragaza ko ari uburyo u Bufaransa bwaba bushakamo kuyobya uburari.

Mu gihe uyu mutangabuhamya [Frank Nziza ] avuga ko ibisasu byahanuye indege byaturutse ku cyicaro gikuru cyari ku Mulindi cy’ingabo za FPR/Inkotanyi,  Morel we yerekana ko ibisasu byahanuye indege ya Habyarimana byaturutse mu kigo cya gisirikare cya Kanombe cyangwa mu nkengero zacyo [ibice byacungwaga n’ingabo za Habyarimana].

Abacamanza Trevidic na Poux,  bo ngo bemeje  ibyari bisanzwe bizwi ko igitero ku ndege ya Habyarimana cyateguwe n’izari ingabo z’u Rwanda zitifuzaga ishyirwa mu bikorwa ry’amasezerano ya Arusha yemereraga FPR kuza mu gihugu igasangira ubutegetsi n’andi mashyaka yari ahari ndetse hakabaho no kuvanga ingabo.

Mu kiganiro Minisitiri w’ububanyi n’amahanga, Louise Mushikiwabo, yagiranye n’ikinyamakuru Le Monde, yatangaje ko iby’iri perereza rishya byihishwe inyuma na bamwe mu bayobozi b’u Bufaransa bari bashyigikiye ubutegetsi bwa Habyarimana mu bikorwa bya jenoside, ngo bakaba bamaze imyaka 23 bashaka gusibanganya ibimenyetso bibashinja kugira uruhare muri ubu bwicanyi bwibasiye abo mu bwoko bw’Abatutsi na bamwe mu Bahutu batavugaga rumwe n’ubutegetsi.

Hari isano bifitanye n’ urugendo  Jacques Kabale aherutsemo  i Paris ?

Nyuma yo guhamagarwa na Leta y’ u Rwanda ku itariki 14 Ukwakira 2017, Ambasaderi w’ u Rwanda mu Bufaransa, Jacques Kabale aherutse kujya i Paris aho yagiranye ibiganiro  bya dipolomasi muri Minisiteri ishinzwe Ububanyi n’ amahanga muri iki gihugu.

Mu gihe uyu Ambasaderi w’ u Rwanda mu Bufaransa yahamagarwaga i Kigali benshi bahise bemeza ko umubano w’ ibihugu byombi urangiriye aho dore ko n’ ubundi wagendaga biguruntege

Aya makuru akomeza avuga kandi ko mu uru ruzinduko rw’ akazi, ambasaderi,  Jacques Kabale yazaniye Minisitiri w’ Ububanyi n’ Amahanga, Louise Mushikiwabo urwandiko rwa mugenzi we w’ u Bufaransa, Jean-Yves Le Drian.

Gusa kugeza magingo aya, ntawuramenya neza igikubiye muri urwo rwandiko ariko icy’ ingenzi ni uko harimo uburyo u Rwanda rwakomeje kugaragaza ko rutishimiye na gato imikorere y’ ubutabera bw’ u Bufaransa kuri dosiye ya jenoside yakorewe Abatutsi muri 1994.

 

WWW.GREATOF250.COM

Check Also

Abanyafurika bimwe ubuhungiro baratangira kugezwa mu Rwanda vuba…..

Ibiro by’Umushinjacyaha wa leta ya Israel kuri uyu wa kabiri, itariki 05 Ugushyingo, byatangarije Urukiko ...

Leave a Reply

Your email address will not be published. Required fields are marked *