Inzoga yiswe “Jumong” ikomeje kwagiza benshi i Kigali….

Abaturage bo mu bice bitandukanye by’Umujyi wa Kigali by’umwihariko mu Karere ka Nyarugenge n’aka Gasabo bagaragaza impungenge batewe n’ubuziranenge bw’inzoga y’inkorano yiswe ‘Jumong’, itamaza benshi mu bayinywa.

Inzoga z’inkorano zisindisha abazinywa zihabwa amazina menshi nka ‘muriture’, ‘nyirantare’, ‘yewe muntu’, ‘speed governor’, ‘kambakamba’, ‘cishwaha’, ‘ikimansuro’, ‘umumanurajipo’, ‘bareteta’ n’ayandi kandi zishobora kugira ingaruka ku buzima bw’abazinywa.

Mu mpera z’Ukwakira 2017, Ikigo cy’Igihugu gitsura Ubuziranenge (RSB) n’izindi nzego bakoze ubugenzuzi, basanga izi nzoga z’urwagwa zikomoka ku bitoki, tangawizi n’ibindi zivangwamo ibintu bidakwiye kunyobwa n’abantu.

Inzoga yitiriwe ‘Jumong’ yengwa mu gitoki ndetse igashyirwamo isukari n’indi misemburo ikomeye ituma abayinyweye bata ubwenge mu buryo bwihuse bakaba banakora amahano.

Bamwe mu baturage bazi ubukana ifite bavuga ko bahangayikishijwe cyane n’ubuziranenge bwayo bitewe n’uburyo uwayinyweye ahindura imyitwarire mu buryo buhutiyeho.

Mukaneza Lydia yavuze ko impamvu anywa iyi nzoga yiswe Jumong ari uko ihendutse ndetse ituma yibagirwa ibibazo ahura nabyo.

Yagize ati “Njye nkundira ‘Jumong’ kuko ihendutse buri gihe iyo nyinyweye igikombe kimwe cya 300 kinyibagiza iby’ubwandu maranye imyaka igera kuri itatu.”

Umusore w’imyaka 28 uzwi ku izina rya Wiz wo mu Murenge wa Rwezamenyo we yagize ati “Ni mbi cyane ahubwo Leta izafatire abayenga ibihano bikomeye kuko ituma abantu barara muri za ruhurura ndetse ikanatuma abantu bakora imibonano mpuzabitsina idakingiye n’iyo baba bari kuyikorana n’indaya.”

Bizimungu Jean Pierre utuye mu Miduha mu Murenge wa Nyamirambo, we yagize ati “Leta nidufashe ice burundu iyi nzoga ya ‘Jumong’ kuko izatuma abantu benshi barwara Sida kubera ko hari n’abayinywa ugasanga biryamaniye n’indaya nta n’agakingirizo bakoresheje.”

Umuyobozi wa RSB, Murenzi Raymond, yaherukaga gutangaza ko ikibazo cy’inzoga z’inkorano zitujuje ubuziranenge bakizi ndetse ko bamwe mu babikora batangiye gutabwa muri yombi.

 

Umwe mu bakunzi ba Jumong ayinywera mu gacupa

 

IRAGUHA RHAMADHAN (Rama x)
WWW.GREATOF250.COM

Check Also

Urwanda rwatwitse toni 130 z’ibisasu byarengeje igihe…..

U Rwanda rwatangije igikorwa kizamara icyumweru cyo gusenya no guturitsa toni 130 z’ibisasu byarengeje igihe, ...

Leave a Reply

Your email address will not be published. Required fields are marked *