Ubwato bw’Abadage bwatabwe hafi y’ikiyaga cya kivu buri gushakishwa n’Urwanda………

U Rwanda rwatangije igikorwa cyo gushakisha ibisigazwa by’ubwato bwa gisirikare bw’Abadage ngo byashyinguwe ku bwende mu nkengero z’Ikiyaga cya Kivu. Ahantu hacukuwe umwobo munini watabwemo ubwo bwato kugeza ubu ntiharamenyekana ariko hakomeje gushakishwa.

Mu 1909 ubwo u Rwanda rwari rugikolonijwe n’u Budage, abamisiyoneri b’Abarutheriyene bazanye ubwato bakoreshaga mu ngendo zabo mu kiyaga cya Kivu, ariko abatuye u Rwanda batazi umugambi wari uhishe w’ubwo bwato.

Ubwo intambara ya Mbere y’Isi yadukaga mu 1914, umuyobozi w’ingabo z’u Budage zari mu Rwanda wari uzwi ku izina rya Tembage, yafashe ubwo bwato, abushyiraho imbunda iremereye ya machine gun abwinjiza mu Kiyaga cya Kivu atangira kuburindisha ubukoloni bwabo bwari busumbirijwe n’Ababibiligi.

Nyuma yo gutsindwa intambara, uyu muyobozi w’ingabo z’u Budage yacukuye icyobo kinini ku nkombe z’Ikiyaga cya Kivu ahambamo ubwo bwato mu Kagari ka Sure, mu Murenge wa Mushubati, ho mu Karere ka Rutsiro. Kubera igihe gishize, hakaba hakekwa ko ubwato bushobora kuba bwarakomeje kwika bujya mu kuzimu kubera isuri.

“Twabwiwe n’ababyeyi bacu ko indwanyi y’Umudage yashyinguye ubwato burimo n’imbunda nyinshi atashakaga ko Ababiligi bafata”, uwo akaba ari Onesme Bimenyimana, umwe mu baturage baturiye aha hantu.

                                Bimenyimana Onesme yerekana ahantu hatabwe ubwo bwato.

Uyu yakomeje avuga ko bagerageje gucukura cyane bajya munsi ngo bataburure ubu bwato bakuremo ubukungu buhishemo, ariko bananiwe. Ngo Abadage ubwabo bakaba baragarutse mu 1980 gushaka ubu bwato ariko nabo bakaba barananiwe kububona.

U Rwanda rukomeje gushakisha ubu bwato ruvuga ko yaba ari inyongera buramutse bushyizwe mu nzu ndangamurage nk’uko KTPress dukesha iyi nkuru ikomeza ivuga.

Umuyobozi w’ikigo cy’igihugu gishinzwe inzu ndangamurage z’igihugu, Ambasaderi Richard masozera akaba agira ati: “Itsinda ryacu riri gukora cyane ngo ribone ubu bwato. Kubutaburura bizaba ari akazi k’agaciro; buzafasha gusobanura amateka y’Intambara y’isi mu Rwanda”.

Amateka y’u Budage mu Rwanda arakungahaye. Bivugwa ko inzu ya mbere igezweho yubatswe mu Mujyi wa Kigali ari iya Dr Richard Kant w’Umudage mu 1908. Yari umuyobozi wa gikoloni ndetse iyi nzu ye na n’ubu iracyahari mu Murenge wa Muhima aho yahinduwemo Inzu ndangamurage y’amateka.

Kuri iyi nzu uhasanga ibindi bigaragaza ko Intambara y’isi ya Mbere yageze mu Rwanda. Mu mwaka ushize mu Karere ka Karongi, hakaba haratowe amaringi y’ikimodoka cy’umutamenwa cyakoreshejwe muri iyi ntambara.

 

 

IRAGUHA RHAMADHAN
WWW.GREATOF250.COM

Check Also

Urwanda rwatwitse toni 130 z’ibisasu byarengeje igihe…..

U Rwanda rwatangije igikorwa kizamara icyumweru cyo gusenya no guturitsa toni 130 z’ibisasu byarengeje igihe, ...

Leave a Reply

Your email address will not be published. Required fields are marked *