Koreya ya ruguru yatangaje ko ishaka gusiba Amerika n’Ubuyapani kukarita y’isi……..

Televiziyo ya leta muri Koreya ya Ruguru kuri uyu wa Kane yatangaje ko iki gihugu kigiye kuroha u Buyapani mu Nyanja ndetse kikagira umuyonga Leta Zunze Ubumwe za Amerika kikazishyira mu icuraburindi kubera gushyigikira ibihano bishya by’Umuryango w’Abibumbye kubera igeragezwa by’igisasu cya kirimbuzi iherutse kugerageza.

Komite ya Koreya ya Ruguru ishinzwe amahoro muri Aziya Pasifika ishinzwe gukomeza umubano w’iki gihugu hanze na poropaganda yanasabye isenyuka ry’akanama k’amahoro n’umutekano ka Loni ishinja kuba igikoresho cy’ikibi (a tool of evil) ngo kagizwe n’ibihugu byamunzwe na ruswa y’amafaranga bigendera ku mabwiriza ya Leta Zunze Ubumwe za Amerika.

Itangazo ryasomwe kuri iyi televiziyo y’igihugu rivuga ko ibirwa bine bigize ibirwa by’u Buyapani bishobora kurindimurirwa mu Nyanja n’igisasu cya kirimbuzi kuko ngo Koreya ya Ruguru itagikeneye u Buyapani nk’umuturanyi wayo.

Umwuka mubi muri aka karere warushijeho kumera nabi nyuma y’aho Koreya ya ruguru igeragereje ku nshuro ya 6 igisasu cya kirimbuzi kandi kirusha ubukana icyo yagerageje kuwa 03 Nzeri nyuma yo kugerageza missles nyinshi zitandukanye harimo imwe yanyuze hejuru y’u Buyapani.

Kuri uyu wa Mbere ushize, nibwo akanama k’amahoro n’umutekano ka Loni katoye umwanzuro wa Leta Zunze Ubumwe za Amerika w’ibihano bishya kuri Koreya ya Ruguru, ubuza iki gihugu kohereza ibikomoka ku budozi hanze kandi uru rwego ari rwo rwa kabiri rwinjirizaga iki gihugu nyuma y’amabuye y’agaciro n’amakara.

Nyuma yo gutora uyu mwanzuro utarashyigikiwe n’u Bushinwa n’u Burusiya, Koreya ya Ruguru nibwo yongeye kugaragaza uburakari ivuga ko igiye gusenya Amerika, u Buyapani na Koreya y’epfo.

Nubwo abavandimwe badahwema kuvuga ko bazabarimbura, Koreya y’Epfo ku rundi ruhande ibinyujije kuri minisitiri ushinzwe kongera guhuza Koreya zombi, yatangaje ko iteganya gutanga inkunga ya miliyoni 8$ yo gufasha abana n’abagore batwite muri Koreya ya Ruguru.

Iki kikaba kizaba ari igikorwa cya mbere cy’ubutabazi Koreya y’Epfo ikoreye Koreya ya Ruguru kuva yagerageza igisasu cya kane muri Mutarama 2016, kandi ngo kikaba ari igikorwa gishingiye kuri politiki imaze igihe kirekire yo gutandukanya ibikorwa by’ubutabazi n’ibya politiki nk’uko iyi minisiteri ivuga.

Nyuma y’ibyatangajwe na Koreya ya Ruguru, u Buyapani bwahise bubyamagana buvuga ko iryo tangazo ari imvugo y’ubushotoranyi kandi irushaho kuzamura umwuka mubi mu karere kandi bidashobora kwemerwa nk’uko byatangajwe n’umunyamabanga w’umuyobozi wa cabinet mu Buyapani, Yoshihide Suga.

Ni mu gihe perezida Donald Trump we yarahiye ko Koreya ya Ruguru itazigera yemererwa gutera ubwoba Leta Zunze Ubumwe za Amerika yitwaje ibisasu bya kirimbuzi, ariko anasaba u Bushinwa gushyira igitsure kuri iki gihugu.

 


WWW.GREATOF250.COM

Check Also

Urwanda rwatwitse toni 130 z’ibisasu byarengeje igihe…..

U Rwanda rwatangije igikorwa kizamara icyumweru cyo gusenya no guturitsa toni 130 z’ibisasu byarengeje igihe, ...

Leave a Reply

Your email address will not be published. Required fields are marked *