Uru ni urugamba rukomeye cyane rw’ingabo z’urwanda ku butaka bwa congo n’igihugu cya Angola….

Abanyarwanda baca umugani ngo “Ryabara uwariraye “undi nawe ati “Uko byagenze ibara umupfu “ hanyuma ariko ukurikiyeho ati “Inkuru mbarirano iratuba”!

Muri aba bacamigani bose twe turabajya hagati turarame tubabarire inkuru itari inkuramutima, ahubwo inkuru y’ubutwari butagereranywa bw’ingabo z’u Rwanda, ingabo z’igihugu zakitangiye ku rwego rutigeze rubaho mu mateka y’ingabo za Afurika.

Mu nkuru yacu turabanza tugerageze kwereka abantu itandukanirizo ry’intambara isanzwe n’ikitwa operation  zihariye zikunze kuboneka mu ntambara zitandukanye cyangwa hakaba n’ubwo izo operasiyo ziba akanya gato zidaherekeje intambara.

Uwavuga ko muri ino si habayeho intambara z’urudaca nyinshi ariko hakarangwa operasiyo za gisirikare nkeya zihariye zibarirwa ku ntoki ntiyaba akabije.

Ku isi habayeho Operasiyo zihambaye zabaye ibirangirire ku isi yose nka Operasiyo Entebbe yakorewe Kampala ikozwe n’ingabo za Israel zari zije ziyemeje kubohoza imbohe zabo,…

1.Ibijya gucika bica amarenga, Laurent Desire Kabila yabanje atoteza abari baramufashije urugamba !

Ubwo urugamba rwo kubohoza Zaire ku ngoma ya Marechal Mobutu Sese Seko Koukou Nguendu wa Zabanga rwasozwaga,habayeho ko ubutegetsi bushya bushyiraho ingamba zo kubaka igihugu cyari kimaze gufata izina rya Republika Iharanira Demokrasi ya Kongo.

Nyuma ariko yo kwirukana Mobutu n’ubutegetsi bwa MPR (Mouvement Populaire Republicain), Ishyaka rukumbi ryayoboraga Zaire kuva kera,byashoboka ko hari ibitarumvikanyweho neza n’abari barishyize hamwe kugirango intambara yo kurwanya no gutsinda Mobutu ibashe kugenda neza.

Nuko Kitona Operation yaje rero aho uwari Perezida wa Republika Iharanira Demokrasi ya Kongo, Bwana Laurent Kabila yahisemo gutandukira igihango cy’incuti z’urugamba agatangira guhohotera abamufashije urugamba yiyibagije ko muri bo harimo n’umugaba w’ingabo ze za Kongo-Kinshasa muri icyo gihe Gen James Kabarebe.

Bamwe muri abo banyarwanda bahuye no kujagarara kwa Laurent Desire Kabila harimo Gen Jamas  Kabarebe, umwe mu bajenerali bo mu Karere k’Ibiyaga bigari banditse amateka mu rwego rwa gisirikare kubera ubuhanga bwe hamwe n’ubwitange bw’abo yari ayoboye cyane cyane mu ntambara zabaye muri Repubulika Iharanira demokarasi ya Kongo.

Byatangiye ari  ku itariki ya 13 Nyakanga 1998 ubwo Laurent Desire Kabila yirukanaga Gen James Kabare ku mwanya w’umugaba mukuru w’ingabo za Kongo-Kinshasa yari ayoboye zose uko zakabaye kuva aho icyo gihugu cyari kimaze kubohorwa guhera 1996-1997-19998!.

Muri icyo gihe Laurent Kabila yatangije ibikorwa byo kubiba amacakubiri mu basirikare ba Kongo yo kwanga abasirikare bagenzi babo, abari bibasiwe ni abatekinisiye b’Abanyarwanda hamwe n’abandi bakomokaga mu miryango n’amoko avuga Ikinyarwanda b’abakongomani .

Guhera icyo gihe amakimbirane aba aratangiye ndetse bamwe kandi benshi tumaze kuvuga haruguru baricwa Kinshasa yose bajugunywa mu mugezi wa Kongo uhinduka umutuku !

Guhera ubwo kandi Laurent Desire Kabila yahise yanga urunuka abasirikare b’u Rwanda maze ashira impumu kugeza naho apanze kubirukana ku butaka bwa Kongo-Kinshasa.

Uko kwirukana abasirikare biganjemo Abanyarwanda n’abandi bake b’abagande ariko kwajemo udukoryo twa gisirikare n’ubutasi bukomeye kuko ngo hari naho Laurent Desire Kabila yatekereje kubapakira indege bose akabohereza Goma-Kigali ariko ahita anapanga itsinda kabuhariwe mu guhanura indege hakoreshejwe za Missiles zirasa indege ngo bose uko bakabaye bashiriremo abyite impanuka.

Ariko inzego z’ubutasi z’u Rwanda ngo ziba zamutahuye, nubwo bitavugwa cyane ariko iyo ubajije abashobora kuba babizi bakubwira ko ingabo z’u Rwanda zari Kinshasa zamusabye ko yafata abandi bakuru b’ingabo bakomeye harimo n’umuhungu we Joseph Kabila [ Perezida wa Kongo-Kinshasa kuri ubu ]bakazana n’abandi muri izo ndege mpaka Goma .

Kwari nko kuvuga bati “Maze azihanure nawe yihekure”..

Ikintu cyateye Laurent Kabila umusonga mu rubavu bikarangira atageze ku mugambi we wo gutikiza abo basirikare bari baranamushyize ku butegetsi.

 

Laurent Desire Kabila ntiyashizwe kuko yahise atangiza ibikorwa byo kwibasira ba batekinisiye twavuze haruguru b’Abanyarwanda na ba bandi bavuga ururimi rw’Ikinyarwanda ariko b’abakongomani maze si ukubica karahava!

Ibi byatumye abahanga mu bya politiki na gisirikare batangira kubona ko “Wirukana umugore uguguna igufa ukazana urimira bunguri” kuko Laurent Desire Kabila yari azanye udushya n’uwo yasimbuye atigeze akora two kwica Abanyamulenge n’ab’i Masisi na Rutshuru bari biganjemo abavuga Ikinyarwanda.

Ku itariki ya 02 Kanama 1998 Laurent Desire Kabila yari amaze kwirukana no kohereza ingabo atifuzaga mu gihugu cye iwabo [ mu Rwanda na Uganda ] abanyujije Goma .

2.Operasiyo nyirizina nuko urugamba rwaje gutangira i Goma na Kitona !

Kuri uwo wa 03 Kanama 1998 nibwo ba basirikare birukanwaga Kinshasa batangiye kwigarurira Goma n’inkengero zayo naho bukeye bwaho itsinda ry’abasirikare b’Abakomando kabuhariwe bo mu Ngabo z’u Rwanda bari bagejejwe i Goma ngo bambuke Rubavu banze gutaha nk’impehe.

Batekereje kuri bagenzi babo bari basigaye bari kwicirwa Kinshasa bajugunywa mu mugezi wa Kongo ibintu babonaga biteye ubwoba n’agahinda, bukeye bwaho baba bagurutse kare basubiza amaso iya Kinshasa!

Mu rukerera rwo kuwa 04 Kanama 1998 baba bigaruriye Ikigo n’ikibuga cy’indege bya gisirikare i Kitona .

Iryo tsinda ry’abasirikare 500 b’u Rwanda baherekejwe n’aba Uganda barashishaga ibitwaro bya rutura  bambariye urugamba, intero ari imwe bati dusubireyo ibi si ibintu by’abantu b’abagabo gusiga bagenzi bacu babagwa buhongo.

Mu ndege Boeing 727 ya Kompanyi y’Ubucuruzi yigenga  ku ntera ya Kilometero 1700 ingabo zirahafata diridiri no ku kibuga cy’indege cyari cyitaruye Kinshasa .

Ikibuga cya Kitona iki kandi kikaba cyari kinubatse mu kigo cya Gisirikare cy’ingabo zirwanira mu kirere za Kongo-Kinshasa kuko cyari giherereye mu ntara ya Bas-Congo ahagana Amajyepfo ya Kinshasa ku bilometero bikabakaba 320 uvuye ku murwa mukuru wa Kinshasa.

Igitego cya mbere cyabaye muri iyi operasiyo, ni ibanga yakoranywe kugeza aho mu rugendo indege yari itwaye ingabo z’u Rwanda yarinze igwa  Kitona, ingabo ziyivamo zirwana mpaka zigaruriye ikibuga cya Kitona indege yaguyeho hamwe n’ikigo cya gisirikare cyose, Kinshasa iri kuriria mu myotsi itazi ibyabaye!

Operasiyo zose ku isi zigirwa n’ibintu 4 aribyo Ubutasi bunoze ,Ubuhanga bw’abasirikare bayikora ndetse n’ibanga rihambaye zakozwemo kandi ibi abasirikare b’u Rwanda bari babyujuje cyane ko uwari abayoboye ariwe Gen James Kabare yari azi uko Kongo ihagaze ijana ku rindi icya 4 ni impamvu nyamukuru y’iyo operasiyo.

Mu minota 30 akazi ko gufata Kitona kari karangiye.

Intego yari ugufata Kinshasa mu gihe gato ariko cyane cyane mu bijyanye n’ amayeri ya gisirikare [ Militay and War strategies ] aba bakomando b’u Rwanda bagombaga kubanza gushegesha ibirindiro by’ingabo za Repubulika Iharanira Demokarasi ya Kongo hakoreshejwe uburyo bwose.

Budakeye 2 inkuru yabaye kimomo ko Gen James Kabarebe yageze Kitona ko kandi ari bunywere icyayi Kinshasa.

Kinshasa abicaga abanyamulemge bari biganje mu Kigo cya Tchachi bagize ubwoba abandi baromoka bariruka batarumva n’isasu na rimwe.

  1. Urugamba kuri Matadi no ku rugomero rwa Inga !

Mu ntambara zabaga zikaze bidatinze nkuko twabivuze haruguru, ingabo z’u Rwanda zoherereje ubutumwa butanditse yewe butari no mu majwi, ahubwo bwari ubutumwa bw’amashusho y’umwijima bwagombaga gusomwa na bose atari Laurent Desire Kabila gusa ,ahubwo bwari ubutumwa bukubiye mu ngingo 3 zikurikira :

 

  • Kinshasa na Brazza-ville zacuze umwijima bitigeze bibaho mu buzima .
  • Inzara yagose umujyi wa Kinshasa wari utuwe na miliyoni 6 biratinda hakarya umugabo hagasiba undi
  • Ikitwa ikinyabiziga cyose cyagize inyota kirahagarara karahava!

Muti gute se kandi ! Ubwo Laurent Desire Kabila yari ari gukanaguzwa amaso yibaza ibimubayeho, ingabo z’u Rwanda zari zamaze gufata umuhora wose n’ikibaya cy’uruzi rwa Kongo.

Hamwe n’umurongo wose uturuka ku cyambu cya Matadi kinini kiri ku nyanja ya Pacifique, aho hari ku wa 13 Kanama 1998 nyuma y’iminsi 9 urugamba rushyiditse.

Iki cyambu kandi niwo wari umutima wa Kongo-Kinshasa yose.

Hakurikiyeho kwigarurira urugomero rwa Inga, rwa rugomero ruri mu nini ku isi nzima rwavagamo amashanyarazi amurikira Kinshasa na Brazza-ville aha kandi hananyuzwaga uruhombo rutwara amavuta ya essence ruyagaburira umujyi wa Kinshasa byose birahagarikwa, Kabila Laurent ahugiye mu kwihimura no kwica Abanyamulenge .

Gusa byari  binagoye kubyita kwihimura kuko bo ntacyo bari bamukoreye kibi ahubwo rwasaga n’urwango rudasonanutse n’imyumvire ye bwite itari ihwitse ku mibanire y’ Abakongomani bavuga Ikinyarwanda n’abandi.

Aha kandi ni naho habohojwe uruganda rucukura peteroli rwa Muanda muri Kongo-Kinshasa.

Bigaragara ko kandi na nubu iki kibazo Laurent Desire Kabila yasize akongeje kigicumbeka na magingo aya.

Matadi imaze gufatwa, Kinshasa ikicwa n’inzara, Inga ikimara gukupwa, Kinshasa ibaye umwijima niho Laurent Kabila yabaye nkukanguka ariko amazi yarenze inkombe.

4.Operasiyo Kitona yari yubatse ku nkingi 3 za mwamba !

  • Inkingi ya mbere kwari ukubaka kuri morale y’abayikoraga hatitawe ku bukana bw’uwo barwana .

Mu ndimi cyangwa termes za gisirikare ibi babyita Asymmetric military war and strategies aho abantu barwana batanganya umubare w’abasirikare n’ibikoresho nta n’uwagereranya ibyo byombi ku mpande zose ariko urugamba rugasutama.

Byumvikane ko ingabo z’u Rwanda zari ku birimetero 2000 byaho zagakuye inkunga kandi zikaba zari zigoswe impande zose n’umwanzi ukuyemo agace ko hakurya mu bwinjiro bw’inyanja bwa Cabinda bubarizwa ku butaka bwa Angola hamwe na Congo-Brazzaville.

Ahandi hari amashyamba manini kandi asaba kugenda n’amaguru mpaka Kinshasa.

  • Icya kabiri kwari ukwibanda ku gufata Kinshasa abicwaga bakabona agahenge kandi Kinshasa igafatwa bwangu.
  • Inkingi ya 3 ariko itavugwa cyane ni uko haba mu Ngabo za Kongo-Kinshasa nyirizina n’abandi banyamulenge bari bararorongotaniye Kinshasa nabo harimo abifuzaga ko akavuyo ka Laurent Kabila kagaharara kubera ubuvandimwe bari baramaze kubakira mu ntambara barwananye bose babohoza Kongo.

Niko byagenze rero Muanda irafatwa, ingabo zikaza intambwe ku muhanda Boma kugera Buama icyambu twavugaga cya Matadi gifatwa ku itariki 13 Kanama 1998 .

5.Kabila ahunga Kinshasa Operasiyo yihindura mu isura mpuzamahanga.

Ubwo Perezida Laurent Desire Kabila yumvaga inkuru y’incamugongo ko ingabo z’u Rwanda zatangiye kwinjira gahoro gahoro muri Kinshasa yafashe indege arahunga ahungira mu biro bye bya Lubumbashi mu  ntara ya Katanga y’ubu .

Ageze Lubumbashi, Laurent Desire Kabila yahise yiyambaza bagenzi be bo mu bihugu bihuriye ku muryango wa SADEC, wa muryango w’Ubukungu w’ibihugu by’Amajyepfo ya Afurika .

Nelsona Mandela wari umukuru w’Intebe w’uyu muryango wa SADEC yahise atumiza inama y’igitaraganya yahuje ibihugu by’ibikonyozi mu bya gisirikare muri ako karere.

Iyi nama yahuje Abaperezida ba Zimbabwe,Angola ,Namibia kuwa 22 Kanama 1998 bikanga ko batinze gato bakwisanga Kabila yacyuye umunyu tayari Kinshasa igafatwa batarisuganya.

 

Ingabo za Zimbabwe zarwanaga umuhenerezo

Ibi ariko byabaga tayari ingabo za Zimbabwe na Namibia zaratangiye kugera i Kinshasa ngo zitanguranwe n’iz’u Rwanda gufata uwo mujyi.

Bukeye bwaho nubwo iyo nama yari irimo ukutumvikana kumwe ku cyakorwa, Angola yafashe umwanzuro wo kwiyemeza kurinda umujyi wa Kinshasa mu gihe abandi bari bakisuganya kuko nta mwanya warusigaye wo kurokora Laurent Desire Kabila wari wabitabaje dore ko n’abadipolomate bo mu Burengerazuba bw’isi bari batangiye guhambira utwangushye.

Guhera ariko ku itariki ya 23 Kamena uwo mwaka wa1998  ingabo 2500 z’Angola zitwaje ibitwaro karahabutaka n’indege z’intambara na za Kajugujugu mu kirere ,ibifaru bitabarika zambutse umupaka zica ruhinga inyuma ingabo z’u Rwanda zitangiza urugamba rutari rworoshye ku mpande zombi.

6.Urugamba rwari rukaze imbere n’inyuma hahandi umwana arira nyina ntiyumve ariko ingabo z’u Rwanda zibanywesha amazi!

Kuwa 26 Kanama 1998 nyuma y’iminsi 22 gusa Operasiyo itangiye Kitona, ingabo z’u Rwanda zari zimaze kugota Kinshasa yose zanigaruriye ikibuga cy’indege mpuzamahanga cya N’djili mu Burasirazuba bwa Kinshasa ahagana mu gace ka Kasangululu.

Ariko urugamba ntirwari rworoshye kuko aha ingabo z’u Rwanda zahahanganiye n’iza Zimbabwe zarwanaga umuhenerezo kugirango Kinshasa idafatwa burundu yose.

Hano niho urugamba rwari rukaze kuko ubwo Kinshasa yari ibonye abayirwanira bavuye mu Ngabo za Zimbabwe kandi zikomeye cyane.

Inyuma hahandi ingabo z’u Rwanda zafashe mbere kubera hahanaga imbibe n’igihugu cya Angola nkuko twabibabwiye haruguru, za ngabo za Angola zari zagose hose ndetse zanatangiye kwigarurira tumwe mu duce twari twarasizwe inyuma n’ingabo z’u Rwanda zitigeze ziteganya ko aho naho haturuka umwanzi.

 

7.Ihurizo ryari ritoroshye ku ngabo z’u Rwanda mu mirwano y’inyuma n’imbere

  • Ingabo z’u Rwanda zahindukiranye iza Angola zinafata ubutaka bwayo zibumarana iminsi itari mike….

Muri iyi nkuru dukesha umwanditsi w’amateka n’inkuru za gisirikare, Bwana Colonel Comer Plummer akaba n’umwe mu ba-sekombata mu ngabo za Amerika, uyu mwanditsi kandi anigisha amasomo y’igisirikare n’intambara muri za Kaminuza zo ku isi zitandukanye .

Muri iyo nyandiko yatangajwe ku wa 26 Gicurasi 2007 ku rubuga militaryhistoryonline,  ubona ko uko iminsi yigiraga imbere ariko intambara yahinduraga isura.

Ubwo ingabo zasiganwaga gufata Kinshasa nta wibazaga ko Angola yakwisuka muri uru rugamba ngo ihere inyuma maze Zimbabwe nayo ituruke imbere ibibazo bivuke.

Ingabo z’u Rwanda zahawe amabwiriza yo gutangira gusubira inyuma mu misozi ikikije Kinshasa ndetse iziri inyuma zikirwanaho bikomeye ibintu byaje gusa n’ibicanze Angola yahururanye n’ibitwaro karahabutaka.

Gusa Angola ntiyahiriwe neza kuko yasanze abasore bikubye mu mashyamba, Angola ikabura uwo irasa n’uwireka byayisabaga guhindura intambara ikarwana kinyeshyamba ariko igasanga ntabwo aribyo yaje yiteguye.

Ibi byashoboje ingabo z’u Rwanda kwisuganya ku butaka bunini kuruta u Rwanda incuro 20 nta ndege nta modoka byose kandi bigafatanwa no kwishakamo ibibatunga nk’uko n’inkomere zagombaga gutwarwa no kuvurwa kuko nta ntambara itagira inkomere.

Aha niho uru rugamba rugera rugacanga abanditsi kuko umugambi wa Angola na Zimbawe kwari ukuza bakagota ingabo zose z’u Rwanda bakazita muri yombi ariko byarangiye nta n’umwe baciye iryera kugeza naho bibaza ko ibintu byaba birimo ubumaji bikabayobera.

Kuva ubwo abasirikare bahuje umugambi wo kurekera Kinshasa mu maboko ya Zimbabwe ariko bahindukirana Angola nubwo itamenyaga abo barwana ari nabwo Kabila yagarukaga i Kinshasa.

Bivugwa ko ahari ingabo z’u Rwanda zaba zarihinduye nk’abasivili zigatangiza urugamba rwa guerrilla dore ko binavugwa ko izi ngabo ziri muri nke zizobereye bene ayo mayeri y’intambara muri Afurika .

Bidateye 2 ingabo z’u Rwanda zateye igihugu cya Angola ziciye inyuma ingabo zayo zari muri Kongo ariko ku bw’amahirwe make zitunguka ahantu bita Maqquela Do Zombo ariko mu ruhande rwagenzurwaga n’umutwe wa UNITA wayoborwaga na Jonas Savimbi.

Jonas Savimbi

Iyi nkuru ikomeza ivuga ko Komanda James Kabarebe byabaye ngombwa ko ahumuriza ingabo za Unita akazisobanurira ko ataje kubarwanya ariko ashaka aho yabona ikibuga cy’indege hafi aho uko cyaba kingana cyose nuko cyaba kirinzwe kose maze akagikoresha.

Izi Ngabo za Bwana Jonas Savimbi ngo wajyaga akunda gusoma amateka y’igisirikare cya RPA-Inkotanyi cyane, zarasetse zirikubanga ziti “Bwana James Kabarebe hari ikibuga kiba ahantu harinzwe cyane n’ingabo za Guverinoma ya Eduardo Dos Santos kandi hatunaniye kuhafata dufite ingabo nyinshi wowe urabigenza ute”?

8• Komanda Kabarebe yasubije abasirikare ba Savimbi ko mu ndangagaciro z’ingabo z’u Rwanda “wowe urabigenza ute” ritabaho

Guhera ubwo itsinda rito ry’intasi z’ingabo z’u Rwanda ryagiye gutata icyo kibuga risanga ngo cyari kirinzwe n’ingabo za Leta 400 zifite ibitwaro bya rutura kandi kizenguruswe na za mines zitabarika.

Ariko ibyo ngo ntacyo byari bivuze ku ngabo z’u Rwanda kuko zari zihangayikishijwe n’uko iki kibuga cyari gito ku burebure bwa Metero 1400 kandi zishaka ko nibura cyareshya na metero 1800 kugirango hagweho indege z’ingabo z’u Rwanda zagombaga kuza gutwara ingabo zibone aho zigwa.

Bwakeye ingabo z’u Rwanda zigabayo igitero simusiga ingabo za Leta ya Angola ziyabangira ingata n’ibikoresho byazo zibita aho.

Ngo izi ngabo za Leta ya Angola ntizizibagirwa udutendo twazibereyeho Maquela Do Zombo kuko zabaye nk’izikubiswe n’inkuba.

 

9.Hakurikiyeho ko ingabo z’u Rwanda zikura amaboko mu mifuka

Izi ngabo z’u Rwanda kwa kundi tuzibona mu muganda n’ahandi muri za Army weeks, naho zakuye amaboko mu mifuka nuko ziyemeza gusana no kwagura ikibuga cy’indege cya Maquela Do Zombo zinashyiraho amatara.

Ubwo kandi ni nako ingabo z’u Rwanda zabaga  zihanganye n’iza Leta ya Angola yambuwe iki kibuga  zashakaga kucyisubiza bubi na bwiza.

Nuko mu gahe gato izi Ngabo turata ubutwari ziba zimaze kurangiza kubaka ikibuga cy’indege no kugishyiraho amamashini manini yagombaga kukimurikira kugirango indege zizajya ziva Kigali zibone aho zigwa haba ninjoro no ku manywa.

Komanda James Kabarebe wari ukuriye iyi operasiyo, byabaye ngombwa ko afata icyemezo cyo gusunika ingabo za Angola ho Kilometero 100 ku murambararo uzengurutse iki kibuga n’agace ka Maquela Do Zombo kugirango ari we, ari inkomere z’ingabo z’u Rwanda ndetse n’ibikoresho byazo babone uko bagaruka mu rwababyaye.

Kuri Noheli ya 1998 nibwo ingabo z’u Rwanda zose zari zimaze kuva ku butaka bwa Angola mu gikorwa cyanabayemo uguhererekanya ingabo z’u Rwanda zimurikirwa bamwe mu basirikare bakuru ba Uganda amatsinda y’abagande babafashaga mu kurasa  ibitwaro bya rutura.

Muri iki gikorwa Komanda James Kabarebe yabwiye General Salim Saleh wari Minisitiri w’ingabo za Uganda ko abasore b’Abagande babaye abasore badasanzwe mu cyongereza ati “They were really good boys,some of the best “ !

Uyu ariko ntiwari umugani ahubwo waganaga akabayeho katazibagirana mu butwari bw’ingabo z’u Rwanda ingoma ibihumbi.

Mugire umunsi mwiza ngabo z’u Rwanda namwe kandi basomyi bacu, ikipe y’abanyamakuru ba Bwiza.com tubifurije mwebwe mwese umunsi mwiza by’umwihariko ku Ngabo z’u Rwanda n’Umugaba wazo w’ikirenga, Nyakubahwa Paul Kagame.

 


IRAGUHA RHAMADHAN 
WWW.GREATOF250.COM

 

 

 

Check Also

Urwanda rwatwitse toni 130 z’ibisasu byarengeje igihe…..

U Rwanda rwatangije igikorwa kizamara icyumweru cyo gusenya no guturitsa toni 130 z’ibisasu byarengeje igihe, ...

Leave a Reply

Your email address will not be published. Required fields are marked *